Tionscadail a fhaigheann maoiniú ó NextGenerationEU

Go dtí le déanaí, ní raibh Seanchaladh Thaillinn nasctha le lár na cathrach le tram. Tá athrú tagtha ar chúrsaí le hinfheistíocht €36.5 milliún ó NextGenerationEU, rud a fhágann go bhfuil gréasán iompair phoiblí níos comhtháite, naisc bhonneagair níos fearr agus caighdeán saoil feabhsaithe ann do mhuintir na háite.

Gach bliain, déanann falscaithe scrios i gceantair leochaileacha faoin tuath sa Phortaingéil. Mar chuid d’iarrachtaí feabhsaithe chun dóiteáin a chosc, d’infheistigh an tír €89 milliún de mhaoiniú NextGenerationEU in acmhainní agus i dtrealamh, sócmhainní aeir d’Aerfhórsa na Portaingéile ina measc.

I réigiún na Vallúine i ndeisceart na tíre ina labhraítear an Fhraincis, tá €6 mhilliún de mhaoiniú NextGenerationEU curtha i leataobh ag an mBeilg chun saoráidí cúraim leanaí a thógáil agus a athchóiriú. Is éard is aidhm don phlean feabhas a chur ar an soláthar cúraim leanaí do theaghlaigh atá ag obair, rud a chruthóidh sochaí níos cothroime do chách.

Trí raon tionscnamh ar fud na tíre, tá an Iodáil ag cur €500 milliún de mhaoiniú NextGenerationEU ar fáil do scéimeanna a chuireann borradh faoi neamhspleáchas agus scileanna daoine faoi mhíchumas. Tríd an méid sin a dhéanamh, tá dul chun cinn suntasach á dhéanamh ag an tír i dtreo cuimsitheacht níos mó.

Tá os cionn 80% dá liúntas maoiniúcháin NextGenerationEU tiomnaithe ag Lucsamburg do chuspóirí a bhaineann leis an aeráid agus do réitigh fuinnimh ghlain. Mar chuid de scéim deontais náisiúnta le haghaidh pointí luchtaithe feithiclí leictreacha, freastalaíonn ionad campála Europacamping ar shoghluaisteacht níos glaine anois.

Agus ranníocaíocht mhaoinithe €11,000,000 faighte aici trí NextGenerationEU, sheol an Laitvia tionscnamh cuimsitheach chun ríomhairí glúine a dháileadh ar scoileanna ar fud na tíre. Tá an tionscadal ar cheann de na hiarrachtaí suaitheanta atá á ndéanamh ag an tír le cabhrú chun an bhearna dhigiteach a dhúnadh.

Cuireann ionad árasán seirbhísithe Žarova in Velenje na Slóivéine, atá á chómhaoiniú trí NextGenerationEU, bealach maireachtála sábháilte neamhspleách ar fáil do sheanóirí ina bpobal féin, rud is sampla de réitigh nuálacha i réimse an chúraim shóisialta do chónaitheoirí agus iad ag dul in aois.

Mar chuid dá tosaíochtaí náisiúnta, tá an tSeicia ag infheistiú maoiniú €360 milliún ó NextGenerationEU chun fuinneamhéifeachtúlacht stoc tithíochta na tíre a fheabhsú. Tá cónaitheoirí i mbloc árasán in Frýdek-Místek ag baint leas as na buntáistí go díreach.

A bhuí le maoiniú ó NextGenerationEU, tá thart ar €360 milliún á infheistiú ag an tSeicia i bhforaoisí ar fud na tíre atá athléimneach ó thaobh na haeráide de. Tá comharchumann in Měřín tar éis tairbhe a bhaint as an méid sin, agus tá sé ar thús cadhnaíochta maidir le foraoiseacht níos inbhuanaithe.