X’għandhom komuni ekonomija b’saħħitha u suq tiela’? Teknoloġija Nadifa.
In-NextGenerationEU huwa strument ta’ rkupru temporanju ta’ €806.9 biljun* imfassal biex jagħti spinta lill-irkupru u jittrasforma l-ekonomiji u s-soċjetajiet tagħna biex isiru aktar moderni u reżiljenti.
Bil-fokus qawwi tan-NextGenerationEU fuq l-iffaċilitar tat-tranżizzjoni lejn ekonomija ekoloġika u diġitali, hemm rabta naturali mal-promozzjoni ta’ teknoloġija nadifa għal ekonomija tal-UE aktar sostenibbli u kompetittiva.
Dawk li jiżviluppaw u jimmanifatturaw it-teknoloġija li se tkun is-sisien tal-ekonomija ta’ għada se jkollhom l-akbar vantaġġ kompetittiv.
In-NextGenerationEU huwa l-“potenza tal-investiment” għat-tranżizzjoni ekoloġika tal-UE, li tipprovdi opportunitajiet għan-negozji ta’ kull daqs biex iżidu l-operazzjonijiet u l-ambizzjonijiet fl-emissjonijiet żero netti tagħhom f’ekosistema tal-UE b'emissjonijiet żero netti li diġà kellha valur ta’ aktar minn €100 biljun fl-2021, li rdoppja l-valur mill-2020. Dan se jkun ta’ benefiċċju wkoll għall-attivitajiet tan-negozji billi jippermetti provvista tal-enerġija sigura, affordabbli u sostenibbli, u billi jżid id-disponibbiltà tas-soluzzjonijiet tat-teknoloġija nadifa meħtieġa biex jitnaqqas l-impatt ambjentali tagħhom.
*Din iċ-ċifra hi fi prezzijiet attwali. Din tammonta għal €750 biljun fi prezzijiet tal-2018.
It-triq għal emissjonijiet żero netti
It-teknoloġija nadifa hija fil-qalba tal-Pjan Industrijali tal-Patt Ekoloġiku bl-għan li tagħmel l-aħjar użu mill-potenzjal tal-emissjonijiet żero netti billi tittrasforma l-industrija tal-Unjoni Ewropea b’għanijiet ambizzjużi ħafna.
In-NextGenerationEU għal teknoloġija nadifa
Taħt in-NextGenerationEU, is-27 pjan nazzjonali għall-irkupru u r-reżiljenza ffinanzjati mill-Faċilità għall-Irkupru u r-Reżiljenza (RRF) jagħmlu disponibbli madwar €250 biljun għall-miżuri ekoloġiċi, inklużi investimenti allokati għall-indirizzar tat-tibdil fil-klima u għall-appoġġ ta’ proġetti ekoloġiċi.
B’mod ġenerali, in-NextGenerationEU u t-teknoloġija nadifa jirrappreżentaw opportunitajiet konsiderevoli għan-negozji biex jikkontribwixxu għal futur aktar sostenibbli filwaqt li jiġġeneraw ukoll benefiċċji ekonomiċi. Meta n-negozji jieħdu vantaġġ mill-momentum attwali, huma jistgħu jippożizzjonaw lilhom infushom għal suċċess fit-tul f’xenarju ekonomiku globali li qed jevolvi b’rata mgħaġġla.
Bin-NextGenerationEU, qed inkunu minn ta’ quddiem għal emissjonijiet żero netti permezz tar-rivoluzzjoni tat-teknoloġija nadifa!
Ħu idea ta’ dak li nagħmlu billi tara l-mappa tal-proġetti tagħna u għażla ta’ proġetti transnazzjonali relatati mat-teknoloġija nadifa:
Il-mappa sservi esklużivament għal skopijiet ta’ informazzjoni u mhix bażi tad-data eżawrjenti ta’ proġetti appoġġjati mill-Faċilità għall-Irkupru u r-Reżiljenza. Din ma tirriflettix id-distribuzzjoni tal-proġetti ffinanzjati mill-Faċilità għall-Irkupru u r-Reżiljenza fl-Unjoni Ewropea, u lanqas f’żoni ġeografiċi jew setturi differenti fi ħdan l-Istati Membri tal-UE. L-ammonti ta’ finanzjament tal-RRF murija għall-miżuri huma bbażati fuq l-istimi tal-kostijiet inizjali inklużi fil-pjanijiet għall-irkupru u r-reżiljenza.
Barra minn hekk, il-proġetti murija huma mingħajr preġudizzju għal kwalunkwe valutazzjoni futura mill-Kummissjoni fil-kuntest tal-verifika tat-twettiq sodisfaċenti tal-istadji importanti u l-miri skont ir-Regolament (UE) 2021/241 li jistabbilixxi l-Faċilità għall-Irkupru u r-Reżiljenza.
Proġetti Rilevanti
