In-NextGenerationEU: għal Ewropa aktar b’saħħitha u aktar reżiljenti
In-NextGenerationEU qed jagħti spinta lill-ekonomija tal-Ewropa u qed jagħmel lis-soċjetajiet tagħna aktar b’saħħithom u aktar reżiljenti, b’riżultati tanġibbli għall-Ewropej permezz tal-ħafna proġetti li jaqgħu taħtu. Bħala l-akbar pakkett ta’ stimolu li qatt kien hemm fl-UE, in-NextGenerationEU qed ikun ta’ eżempju u qed jistabbilixxi kif għandu jkun magħmul mudell ġdid ta’ tkabbir ibbażat fuq ekonomija nadifa, innovattiva, u inklużiva kif ukoll fuq sovranità diġitali u teknoloġika.
- B’investiment fis-servizzi tas-saħħa, in-NextGenerationEU qed jikkontribwixxi għal soċjetà aktar ġusta u li tagħti kas tal-bżonnijiet tan-nies, u li hija lesta għall-isfidi li għandna quddiemna.
- Bis-sostenn li jagħti lill-edukazzjoni u lill-ħiliet, qed jgħin biex il-forza tax-xogħol tagħna titħejja għal opportunitajiet ġodda f’dinja xprunata mit-teknoloġija.
- Bl-assistenza li jagħti lill-SMEs u lill-intraprendituri żgħażagħ tagħna, qed irawwem ukoll l-innovazzjoni, joħloq l-impjiegi, u jistimula t-tkabbir futur.
Billi ninvestu fil-futur tal-Ewropa, flimkien nistgħu nibdlu l-impenn tagħna f’realtà konkreta
B’self u għotjiet ipprovduti lill-Istati Membri permezz tal-Faċilità għall-Irkupru u r-Reżiljenza (Recovery and Resilience Facilty, RRF), in-NextGenerationEU qed jinvesti f’għadd ta’ oqsma kritiċi. Dawn jinkludu:
- It-tranżizzjoni ekoloġika
- It-trasformazzjoni diġitali
- Il-koeżjoni soċjali u territorjali
- Il-politiki għall-ġenerazzjoni li jmiss
- Tkabbir intelliġenti, sostenibbli, u inklużiv
- Ir-reżiljenza tas-saħħa, ekonomika, soċjali, u istituzzjonali
Madwar l-Ewropa, diġà tlestew ħafna inizjattivi ffinanzjati min-NextGenerationEU, filwaqt li oħrajn għadhom għaddejjin. Biex issegwi l-progress ta’ kull pajjiż fl-implimentazzjoni tal-proġetti deskritti fil-Pjanijiet nazzjonali għall-Irkupru u r-Reżiljenza tagħhom, agħti daqqa t’għajn lit-Tabella ta’ Valutazzjoni għall-Irkupru u r-Reżiljenza li ħejjejna.
Fondi allokati permezz tar-Regolament dwar l-RRF
In-NextGenerationEU qribek
Il-Kummissjoni Ewropea nediet diversi kampanji ta’ komunikazzjoni biex tippromwovi l-benefiċċji tan-NextGenerationEU. F’Jannar 2025 – meta ħafna proġetti diġà tlestew jew għadhom għaddejjin – il-Kummissjoni nediet kampanja ġdida fl-Istati Membri kollha tal-UE. Din tiffoka fuq li jkollna iktar saħħa u reżiljenza, b’mod partikulari fl-oqsma tal-edukazzjoni u tal-ħiliet, tan-negozju, u tas-servizzi tas-saħħa.
Minn Frar 2024 s’issa, saru ħafna kampanji lokali biex juru liċ-ċittadini l-impatt pożittiv li l-proġetti ffinanzjati min-NextGenerationEU kellhom fuq il-komunitajiet lokali.
Flimkien tajna prova li, meta taġixxi bi qlubija, l-Ewropa tasal fejn trid tasal. Għad fadlilna ħafna x’nagħmlu, għaldaqstant ejjew nibqgħu magħqudin. Ejjew inwettqu dak li għandna nwettqu għal-lum u nħejju ruħna għal għada.
Sib proġetti li qed isiru f’pajjiżek
Tista’ ssegwi l-progress ta’ kull Stat Membru bit-Tabella ta’ Valutazzjoni għall-Irkupru u r-Reżiljenza jew bis-27 Snapshot tal-Pajjiżi tal-Kummissjoni Ewropea, u ssir taf dwar inizjattivi li għaddejjin jew li diġà tlestew. Barra minn hekk, tista’ tesplora l-mappa interattiva tagħna għal dettalji speċifiċi dwar proġetti fir-reġjun tiegħek:
Il-mappa sservi esklużivament għal skopijiet ta’ informazzjoni u mhix bażi tad-data eżawrjenti ta’ proġetti appoġġjati mill-Faċilità għall-Irkupru u r-Reżiljenza. Ma tirriflettix id-distribuzzjoni tal-proġetti ffinanzjati mill-Faċilità għall-Irkupru u r-Reżiljenza fl-Unjoni Ewropea, u lanqas f’żoni ġeografiċi jew setturi differenti fi ħdan l-Istati Membri tal-UE. L-ammonti ta’ finanzjament tal-RRF murija għall-miżuri huma bbażati fuq l-istimi tal-kostijiet inizjali inklużi fil-pjanijiet għall-irkupru u r-reżiljenza.
Barra minn hekk, il-proġetti murija huma mingħajr preġudizzju għal kwalunkwe valutazzjoni futura mill-Kummissjoni fil-kuntest tal-verifika tat-twettiq sodisfaċenti tal-istadji importanti u l-miri skont ir-Regolament (UE) 2021/241 li jistabbilixxi l-Faċilità għall-Irkupru u r-Reżiljenza.
Proġetti tan-NextGenerationEU
B’kontribuzzjoni ta’ finanzjament ta’ €11,000,000 li saret permezz tan-NextGenerationEU, il-Latvja nediet inizjattiva komprensiva biex tqassam laptops lill-iskejjel fil-pajjiż kollu. Il-proġett huwa wieħed mill-isforzi ewlenin tal-pajjiż biex jgħin fit-tnaqqis tad-distakk diġitali.
Kofinanzjat permezz tan-NextGenerationEU, il-kumpless ta’ appartamenti b’servizz ta’ Žarova f’Velenje, is-Slovenja, joffri liċ-ċittadini anzjani għajxien sikur u indipendenti fil-komunità tagħhom stess, u dan hu eżempju innovattiv ta’ kura soċjali għar-residenti hekk kif jixjieħu.
Bl-għajnuna tal-finanzjament tan-NextGenerationEU, iċ-Ċekja qed tinvesti madwar €360 miljun f’foresti reżiljenti għall-klima fil-pajjiż kollu. Wara li bbenefikat minn dan, kooperattiva f’Měřín qed twitti t-triq għal forestrija aktar sostenibbli.