Billi ninvestu fil-futur tal-Ewropa, flimkien nistgħu “Nagħmluha Realtà”

In-NextGenerationEU ġie stabbilit biex jgħin fit-tiswija tal-ħsara ekonomika u soċjali kkawżata mill-pandemija tal-COVID-19. Permezz tal-proġetti ta’ investiment li tiffinanzja, l-Unjoni Ewropea qed tistabbilixxi l-pjan ta’ azzjoni għal futur aktar ekoloġiku, aktar diġitali u aktar reżiljenti. 

Il-qofol ta’ dan il-pakkett massiv ta’ stimolu – l-akbar wieħed li qatt ġie ffinanzjat fl-Ewropa – huwa l-Faċilità għall-Irkupru u r-Reżiljenza (RRF), li permezz tagħha l-biċċa l-kbira tal-finanzjament jiġi allokat fil-forma ta’ self u għotjiet.  

^{* Dan jirrappreżenta l-ammont massimu previst mir-Regolament RRF.}

Il-pajjiżi kollha tal-UE żviluppaw Pjanijiet Nazzjonali għall-Irkupru u r-Reżiljenza (RRPs) komprensivi mfassla biex jallokaw il-finanzjament tan-NextGenerationEU għall-ħtiġijiet speċifiċi tagħhom. Dawn il-fondi huma diretti lejn firxa wiesgħa ta’ proġetti u inizjattivi ta’ investiment, li ħafna minnhom diġà tlestew. 

Minn proġetti ta’ laneċ fuq il-cable li jaħdmu b’enerġija solari fil-Kroazja rurali għal infrastruttura modernizzata taċ-ċikliżmu fit-Tramuntana tal-Belġju, in-NextGenerationEU llum qed jixpruna bidla pożittiva u qed iwitti t-triq għal għada aktar sostenibbli, b’sitt oqsma ta’ prijorità ewlenin:  

• Tranżizzjoni ekoloġika 
• Trasformazzjoni diġitali 
• Koeżjoni soċjali u territorjali 
• Politiki għall-ġenerazzjoni li jmiss 
• Tkabbir intelliġenti, sostenibbli u inklużiv 
• Reżiljenza tas-saħħa u reżiljenza ekonomika, soċjali u istituzzjonali  

L-investiment f’dawn l-oqsma se joħloq l-impjiegi u jixpruna t-tkabbir f’setturi tal-ekonomija kritiċi u ffukati fuq il-futur. Dan se jgħin biex tinbena Ewropa aktar diġitali, filwaqt li jappoġġja t-tranżizzjoni lejn enerġija aktar nadifa u jistabbilixxi t-triq għan-newtralità klimatika sal-2050.  

Immonitorja l-progress ta’ kull pajjiż fit-Tabella ta’ Valutazzjoni għall-Irkupru u r-Reżiljenza u ikseb għarfien dwar il-proġetti ffinanzjati f’kull Stat Membru. Agħti daqqa t’għajn lejn il-mappa interattiva tagħna hawn taħt għal dettalji speċifiċi dwar proġetti fir-reġjun tiegħek: 

Sib proġetti f’pajjiżek

In-NextGenerationEU fl-azzjoni

Minn Frar 2024, il-Kummissjoni Ewropea bdiet tikkollabora direttament mar-Rappreżentanzi tagħha f’diversi pajjiżi tal-UE biex tenfasizza l-impatt tal-proġetti ffinanzjati min-NextGenerationEU fil-komunitajiet lokali, permezz ta’ kampanji ta’ komunikazzjoni lokali. Dawn il-kampanji lokali jfittxu li jikkomunikaw direttament maċ-ċittadini u mal-benefiċjarji tal-proġetti, filwaqt li jisfruttaw diversi mezzi biex juru l-innovazzjonijiet u l-infrastruttura ffukati fuq il-futur li qed jiġu stabbiliti domestikament bl-għajnuna ta’ NextGenerationEU.